ابیاتی از شاعر بزرگ عصر؛ استاد شهریار:

حیدربابا ، ایگیت امک ایتیرمز

عؤمور کئچر، افسوس بره بیتیرمز

نامرد اولان عؤمری باشا یئتیرمز

بیزده، واللاه ، اونوتمارئق سیزلری

گؤرنمسک حلال ائدون بیزلری

***

حیدربابا ، شیطان بیزی آزدئرئب

محبتی اؤرک لردن قازدئرئب

قره گؤنون سرنوشتین یازدئرئب

سالئب خلقی بیر بیرینین جانئنا

باریشیغی بلشدیریب قانئنا

***

گؤز یاشئنا باخان اولسا ، قان آخماز

اینسان اولان ، خنجر بئلینه تاخماز

آمما حئییف کور توتدوغون بوراخماز

بهشتیمیز جهنم اولماق دادیر

ذیحجه میز محرم اولماق دادیر

***

حیدر بابا دؤنیا یالان دؤنیادی

سلیماننان ، نوحدان قالان دؤنیادی

اؤغول دؤغان ، درده سالان دؤنیادی

هر کیمسیه هر نه وئریب ، آلئبدی

افلاطون ننان بیر قوری آد قالئبدی

***

حیدربابا ، مرد اوغول لار دوغگینان

نامردلرین  بورونلارین اوغگینان

گدیکلرده قوردلاری توت ، بوغگینان

قوی قوزولار آیین-شایین اوتلاسین

قویونلارون قویروقلارین قاتلاسین

***

حیدربابا ، سنون گؤیلون شاد اولسون

دؤنیا وارکن ، آغزون دولی داد اولسون

سنّن گئچن تانیش اولسون ، یاد اولسون

دینه منیم شاعیر اوغلوم شهریار

بیر عمر دور غم اوستونه غم قالار

نويسنده : | تاريخ : سه شنبه ششم مرداد 1388 |  نوع مطلب : ابیاتی از شاعر بزرگ عصر، استاد شهریار |